Innritun fer fram á vorin í gegnum Miðstöð menntunar og skólaþjónustu.
Inntökuskilyrði
Nemendur geta valið um að stunda nám á málabraut eða náttúrufræðibraut. Til að geta innritast er æskilegt að nemendur hafi hlotið a.m.k. einkunnina B+ í íslensku og ensku inn á málabraut og í íslensku og stærðfræði inn á náttúrufræðibraut.
Auk þess eru einkunnar í náttúrufræði hjá nemendum sem sækja um náttúrufræðibraut og einkunnar í dönsku (eða öðru Norðurlandamáli) hjá þeim sem sækja um málabraut skoðaðar.
Aðrir þættir koma einnig til skoðunar við mat umsóknar, m.a. skólasókn, einkunnir í öðrum námsgreinum, búseta og önnur gögn sem umsækjandinn leggur fram, t.d. gögn sem staðfesta m.a. þátttöku í félagslífi, íþróttum, listnámi og öðru námi.
Gögn nemenda sem koma erlendis frá og hafa ekki vitnisburð frá íslenskum grunnskóla verða metin sérstaklega.
Bekkjaskóli
MR er þriggja ára bekkjaskóli. Á fyrsta ári eru bekkjum skipt upp eftir því hvort nemendur eru á málabraut eða náttúrufræðibraut. Í lok fyrsta árs velja nemendur á málabraut annað hvort fornmála- eða nýmáladeild en nemendur á náttúrufræðibraut velja á milli eðlisfræði- eða náttúrufræðideilda. Bekkirnir hafa sína heimastofu þar sem öll kennsla, önnur en verkleg kennsla, fer fram.
Við innritun velja allir nemendur 3. mál, valið stendur á milli frönsku, spænsku eða þýsku.
Félagslíf
Í skólanum er fjörugt félagslíf, tvö nemendafélög eru starfandi við skólann: Framtíðin og Skólafélagið. Nemendafélögin standa fyrir fjölbreyttum viðburðum og má meðal annars nefna að tvö leikfélög eru starfandi við skólann.
