Í tilefni af degi íslenskrar tungu 17. nóvember efndi íslenskudeildin til ljóða- og örsagnakeppni milli nemenda og starfsfólks. Ljóð og örsaga eftir nemanda og starfsmann, voru valin úr fjölda innsendra og verðlaunuð á Sal. Svo skemmtilega vildi til að bæði verðlaunaljóðið og -örsagan voru eftir Heklu Dís O‘Shea 5.T og átti Bjarni Gunnarsson stærðfræðikennari bæði verðlaunaljóð og -örsögu í flokki starfsmanna. Til hamingju bæði tvö!
Hrókur alls fagnaðar
Hann læðist í kringum mig, tiplar á tánum.
Strýkur varirnar og hvíslar öllu því óþægilega sem vitað er um mig.
Honum finnst ég vera veikburða, aum.
Við kynntumst á Blásteini fyrir mörgum öldum, ég ölvuð af ást undir áhrifum hans.
Heilinn grautur gerður úr minnisleysi örlagaríka kvöldsins.
Skuggi hans lét mig ekki í friði árin á eftir.
Hann er dauðadæmd minning, eftirsjáanlegur atburður og lamandi tilfinning.
Svört mygla í vínrauða hjarta mínu, sannleikurinn.
Höfundur: Hekla Dís O‘Shea 5.T
Íslenskan
Við þökkum fyrir okkar móðurmál
og minnum okkur á það sem er brýnast,
að íslensk tunga auðgar líf og sál
og er sá fjársjóður sem ei má týnast.
Íslenskan oft lyftir huga hátt
í heimi þeim sem menning okkar geymir,
í önnum dagsins einnig hefur mátt,
áhrif góð sem þjóðarsál ei gleymir.
Höfundur: Bjarni Gunnarsson stærðfræðikennari
