Menntaskólinn í Reykjavík var settur í 180. sinn þriðjudaginn 19. ágúst í Dómkirkjunni. Nemendur og starfsfólk gengu saman fylktu liði frá Gamla skóla yfir í Dómkirkjuna.
Aðsókn í skólann í vor var góð og sóttu fleiri nýnemar um en komust að. 290 nemendur munu hefja nám við skólann í vetur. 242 á náttúrufræðibraut og 48 á málabraut.
Alls verða 753 nemendur við skólann í vetur, nokkuð fleiri en í fyrra (714). 290 í 4. bekk, 252 í 5. bekk, 204 í 6. bekk og 7 nemendur á starfsbraut.
Eins og fyrri ár hefur sumarið verið vel nýtt til viðhalds á húsnæði skólans. Í Gamla skóla hafa stofur A, B og T verið gerðar upp. Hljóðvist, lýsing og loftgæði eru nú allt önnur í þessum stofum. Vonandi fáum við fleiri stofur gerðar upp á sambærilegan hátt næsta sumar. Ýmislegt annað var framkvæmt í sumar, t.d. fékk skólinn rausnarlega og fallega gjöf listaverka frá afmælisárgangi stúdenta sem útskrifuðust 1975. Þið sjáið þau listaverk á göngum Casa Nova.
Við bjóðum nemendur og starfsfólk velkomið aftur til starfa.
